အတွေးများနဲ့ နှိပ်စက်၊ အိပ်ပျက်တဲ့ ညတွေ

စာမရေးဖြစ်တာ အတော်ကြာနေပြီဆိုတာ ကိုယ့်ကိုယ်ကို သိပေမယ့် အခုတလော ကျွန်တော့်ပတ်ဝန်းကျင်မှာလည်း ဘာမှ အဆင်မပြေဘူး ဖြစ်နေတယ်။ ကွန်ပျူတာက ပျက်လိုက်၊ ကျန်းမာရေးက မကောင်းလိုက်နဲ့။ ဒီကြားထဲ စိတ်ဖိစီးမှုက ၀င်နေတော့ ဘာမှကို လုပ်ချင်စိတ် မရှိတော့ဘူး။ စာအုပ်တွေနဲ့ ကင်းကွာသွားတာလည်း တစ်လလောက် ရှိနေပြီ။ ညညဆိုလည်း တစ်ချက်ထိုး၊ နှစ်ချက်လောက်မှ အိပ်ဖြစ်တော့ ဘာတွေများ ကျွန်တော့်မှာ ဒီလောက်တောင် နှိပ်စက်နေပါလိမ့်ဆိုတာ ကိုယ့်ကိုယ်ကို မတွေးတတ်အောင် ဖြစ်နေတယ်။ နောက်ဆုံး သူငယ်ချင်းတွေနဲ့ တိုင်ပင်ပြောဆိုရင်း ထွက်လာတဲ့ အဖြေတစ်ခုက ကြိုတင်တွေးတောဖို့ မလိုအပ်သော အတွေးများကို ကြိုတင်တွေးတောမိခြင်းပါပဲ။ မိုးပြိုမှာ ကြောက်တဲ့သူလို ဖြစ်နေပါရောလားလို့။

စကားပြောတဲ့အခါတိုင်း အားမပါသလို ဖြစ်နေတာ ကိုယ့်ကိုယ်ကို သတိမထားမိခဲ့ဘူး။ မြန်မာနိုင်ငံက အဖေနဲ့ အမေဆီ ဖုန်းဆက်တော့ ``သား နေကောင်းရဲ့လား´´ လို့ မေးတော့ ကျွန်တော်က ဘာဖြစ်လို့လဲလို့ ပြန်မေးမိတယ်။ ``သားရဲ့ အသံက အားမရှိသလိုပဲ´´ တဲ့။ သူငယ်ချင်းတွေကလည်း တစ်ခါတလေ ဒီလိုပဲ ပြောတတ်တော့ ``ငါ ဘာဖြစ်နေတာလဲ´´ လို့ စဉ်းစားမိတယ်။ တစ်ည သူငယ်ချင်းမိန်းကလေးတစ်ယောက်နဲ့ Chatting မှာ စာရိုက်ပြီး စကားပြောတော့ ``ဇေယျာ.. နင် စိတ်တွေ ရှုပ်ထွေးနေပုံပဲ´´ တဲ့။

စိတ်ကျရောဂါများ ခံစားနေရတာများလားလို့ ကိုယ့်ကိုယ်ကို ခံစားမိတယ်။ အရင်တုန်းက Depression ကို စာအုပ်တွေမှာ ဖတ်ဖူးပေမယ့် သေချာ မခံစားမိခဲ့ဘူး။ Depression ဟာ ဘာကြောင့် ဖြစ်ပေါ်လာသလဲဆိုတာ သိပ်မစဉ်းစားခဲ့မိဘူး။ အခုနောက်ပိုင်း နည်းနည်းနားလည်လာတာက Depression ဖြစ်ပေါ်လာတဲ့ ပထမဆုံးအချက်က ကိုယ့်ကိုယ်ကို ယုံကြည်မှုနည်းလာခြင်းကြောင့်လို့ ယူဆမိတယ်။ မျှော်လင့်ချက်တွေ၊ ရည်မှန်းချက်တွေ၊ လက်ရှိ အခြေအနေမှာ ငါ ဘယ်လို ရပ်တည်မလဲ၊ ဘယ်လိုရှေ့ဆက်သွားမလဲဆိုတာတွေကို တွေးတောရင်း အတွေးများကို လတ်တလောအခြေအနေမှာ မဆုံးဖြတ်တော့ဘဲ တွေဝေသွားရာကတစ်ဆင့် စိတ်ရှုပ်ထွေးမှုတွေ ဖြစ်လာတာပဲ။ စိတ်ရှုပ်ထွေးမှုတွေကြောင့် ဘာအကြောင်းရာပဲဆုံးဖြတ် ဆုံးဖြတ် အမှန်တရားနဲ့ မနီးစပ်နိုင်တော့ဘူး ဖြစ်လာတယ်။ ကြည်လင်တဲ့စိတ် မရှိတော့တာကြောင့် အတွေးအခေါ်တွေကလည်း တစတစ ပျောက်ဆုံးသွားတယ်။ ကျွန်တော့်ကို ကျွန်တော် ပြန်စဉ်းစားမိတာက ``ငါ ဒီလို ဖြစ်နေပြီလား´´ ဆိုတာပဲ။
``တာဝန်`` ဆိုတဲ့ စကားလုံးကို နားလည်ထားမိပေမယ့် တကယ့်တကယ် လုံးဝဥဿုံ ကိုယ့်အပေါ် ဒီတာဝန်ကြီး ကျရောက်လာပြီဆိုရင် ထမ်းရွက်နိုင်ပါ့မလား။ လုပ်ငန်းခွင်ပိုင်းဆိုင်ရာမှာ တာဝန်များစွာကို တတ်နိုင်စွမ်းရှိသမျှ တာဝန်ယူ လုပ်ကိုင်နိုင်ခဲ့ပေမယ့် လူမှုရေးနယ်ပယ်တစ်ခုမှာ ``တာဝန်´´ တစ်ခု ကိုယ့်အပေါ် လုံးဝဥဿုံ ကျရောက်လာခဲ့တဲ့အခါ.....။ ``ကိစ္စများမြောင် လူတို့ဘောင်´´ ဆိုသလိုပဲ ကိစ္စတစ်ခုကို စဉ်းစားလိုက်တိုင်း တခြားသော ကိစ္စတစ်ခုကို ပြန်စဉ်းစားရတော့ အချို့သောကိစ္စတွေမှာ ယတိပြတ် ဆုံးဖြတ်နိုင်စွမ်း မရှိဘူး ဖြစ်လာတော့တယ်။ ဆယ်တန်းအောင်တော့ ကျွန်တော့်ရဲ့ အစ်ကိုလို ခင်မင်ရတဲ့ ဆရာတစ်ယောက် ချက် (Chess) ထိုးနည်း သင်ပေးခဲ့တယ်။ သူ သင်ပေးခဲ့တဲ့ ရည်ရွယ်ချက်က Chess ထိုးတတ်အောင် မဟုတ်ဘူးတဲ့။ ဘ၀မှာ စဉ်းစားတတ်အောင်လို့တဲ့။ Chess ဆိုတဲ့ ကစားနည်းကလဲ အားလုံးသိကြတဲ့အတိုင်း တစ်ခုကို ရွှေ့တော့မယ်ဆိုတိုင်း ကျန်တာတွေ အတွက်ကိုပါ ပြန်စဉ်းစားရတာကိုး။ ဘ၀ဆိုတာလည်း ဒီလိုပဲတဲ့။ ``မင်း တစ်ခုခု လုပ်တော့မယ်ဆိုတိုင်း တခြားကိစ္စတစ်ခုကိုပါ တစ်ခါထဲ စဉ်းစားထားပါတဲ့´´ သူက ကျွန်တော့်ကို အဲသလို ဆုံးမခဲ့တယ်။

ကျွန်တော့်အသက် ၂၀ ပတ်ဝန်းကျင်လောက်ကတည်းက ကျွန်တော့်ဘ၀အတွက် မူတစ်ခု ချမှတ်ခဲ့တယ်။ တစ်ချိန်မှာ တစ်ခုသာလျှင် အရေးကြီးတယ်။ တစ်ချိန်ထဲမှာ နှစ်ခု၊ သုံးခုလုံး အရေးမကြီးဘူးလို့။ အဲဒီလိုမျိုး သုံးလေးခု ဆုံလာရင်လည်း အဲဒီထဲက တစ်ခုပဲ ရွေးလို့ ကိုယ့်ကိုယ်ကို ပြန်သင်ပေးခဲ့မိတယ်။

 

ကာလအပိုင်းခြားတစ်ခုထိ ဒီမူလေးဟာ ကျွန်တော့်အတွက် အဆင်ပြေခဲ့တယ်။ ဒါပေမယ့် အခုချိန်မှာ ဒီမူလေးဟာ ကျွန်တော့်အတွက် ဘယ်လိုမှ အဆင်မပြေတော့ဘူး ဖြစ်နေတယ်။ ဘာကြောင့်လဲ။ လေး ငါး ရှစ်နှစ်တာကာလပတ်လုံး အဆင်ပြေခဲ့ပြီးမှ အခုကျမှ ဘာကြောင့်အဆင်မပြေရတော့တာလဲ။ အခုလည်း ရွေးပြီး လုပ်စရာများစွာထဲက တစ်ခုကို ရွေးပြီး လုပ်လိုက်ရင်ရော အဆင်မပြေနိုင်ဘူးလားလို့ စဉ်းစားပြီး ကိုယ့်ကိုယ်ကို မေးခွန်းထုတ်မိတယ်။ ဒီမေးခွန်းနဲ့အတူ နောက်ဆက်တွဲတစ်ခုက ကပ်ပါလာတယ်။ ``အချိန် (Time) ဆိုတာပါပဲ´´။ ကိစ္စများစွာကို တပြိုင်ထဲလုပ်မယ်ဆိုရင် လည်း ဘယ်အရာမှ ထိထိရောက်ရောက် လုပ်နိုင်မှာ မဟုတ်သလို ကိစ္စတစ်ခုထဲကို အချိန်ပေးပြီး လုပ်မယ်ဆိုရင် အခြားသောကိစ္စတွေဟာ ပျောက်ဆုံးသွားနိုင်တယ်။ မစောင့်နိုင်သော မိသားစုရေး၊ လူမှုရေး၊ စီးပွားရေးကိစ္စများစွာကို တစ်ပြိုင်ထဲ လုပ်နိုင်လောက်အောင် ကျွန်တော်ကိုယ်တိုင်က အဲသလောက် တော်တတ်နေသူ မဟုတ်တော့ ခက်သား။ တစ်ခါတလေ ကျွန်တော်တို့ဟာ ဦးစားပေး လုပ်ရမယ့်အရာတွေ တိုက်ဆိုင်လာတဲ့အခါ ဘယ်အရာကို အရင်ဦးစားပေး လုပ်ရမှန်းမသိ ဖြစ်သွားတတ်တယ်။ ကျွန်တော်ကိုယ်တိုင်လည်း အခုတော့ အဲဒီလိုဖြစ်နေတာ။

ကျွန်တော်ဆိုတဲ့ကောင်ကလည်း ခက်သား။ ကိုယ့်ကိုယ်ကို စည်းမျဉ်းတွေ ချ၊ မူတွေချပြီး လျှောက်လှမ်းခဲ့တော့ အဲဒီ စည်းမျဉ်းတွေ မူတွေအောက်မှာ အခုတော့ ပိနေပြီလေ။ ရုန်းထွက်လို့ မရတော့ဘူး ဖြစ်နေတာကိုး။ ``ငါ ဘယ်လောက်ထိ လုပ်နိုင်စွမ်းရှိလဲ´´ လို့ အမြဲတမ်း ကိုယ့်ကိုယ်ကို တိုက်ခိုက်မေးခွန်း မေးမိတတ်တယ်။ မိသားစုရေး၊ လူမှုရေး၊ စီးပွားရေးကိစ္စများစွာမှာ ဒီမေးခွန်းလေးနဲ့အတူ ရှင်သန်ရပ်တည်ခဲ့တယ်။ နောက်ဆုံးထွက်သက်အထိ ``ငါ ဘယ်လောက်ထိ လုပ်နိုင်စွမ်းရှိလဲ´´ ဆိုတဲ့ မေးခွန်းကိုပဲ ထပ်တလဲလဲမေးပြီး သေဆုံးသွားမယ်လို့ ကိုယ့်ကိုယ်ကို ယုံကြည်ထားတဲ့ကောင်။ အခုရော ``ငါ ဘယ်လောက်ထိ လုပ်နိုင်စွမ်းရှိလဲ´´ လို့ ထပ်မေးရတော့မလို ဖြစ်နေပြီ။ မိသားစုအတွက် မိသားစုဝင်ကောင်းတစ်ယောက်ဖြစ်ချင်တဲ့ ကျွန်တော်။ လူမှုရေးနယ်ပယ်မှာလည်း ယုံကြည်မှုပြည့်ဝတဲ့သူတစ်ယောက် ဖြစ်ချင်တယ်။ လူမှုရေးနယ်ပယ်ဆိုတာက ကျွန်တော့်ပတ်ဝန်းကျင်ကနေ ကျွန်တော့်အနာဂတ် ဘ၀အထိ ပါဝင်နေတော့ ပစ်ပယ်လို့ မရပြန်ဘူး။ စီးပွားရေးဆိုတာကလည်း ကျွန်တော် တတ်စွမ်းသမျှ အကောင်းဆုံး ရပ်တည်ချင်သူ။

အချိန် (Time) ဆိုတဲ့အကြောင်းကို ကျွန်တော် ထည့်ပြောခဲ့တယ်။ အခု ကျွန်တော့်အသက် ၂၈ နှစ်ရှိပြီ။ ဘ၀အခြေအနေအရ မိသားစုဘ၀ ငွေကြေးပြည့်စုံမှု မရှိသေးဘူး။ မြန်မာနိုင်ငံမှာ ကျန်ခဲ့တဲ့ အမိအဖနှစ်ပါးကိုလည်း အကောင်းဆုံးဖြစ်အောင် ထားချင်သေးတယ်။ ကျွန်တော့်ဘ၀အတွက် စီးပွားရေးကလည်း ပြည့်စုံမှု မရှိသေးဘူး။ ကျွန်တော့်အနာဂတ်အတွက်လည်း အများကြီး လုပ်စရာတွေ ရှိသေးတယ်။ လူသားတိုင်းရဲ့ လူ့လောက တာဝန်တစ်ခုကိုလည်း အခုထိ မထမ်းဆောင်ရသေးဘူး။ ဒီအရာတွေအားလုံးအတွက် ကျွန်တော့်မှာ အချိန်နဲ့ ငွေကြေး လိုအပ်မှုများစွာ ရှိနေတယ်။ ဒါတွေအားလုံးဟာ တစ်ခုချင်းစီ လုပ်လို့မရသလို တစ်ပြိုင်ထဲလည်း လုပ်လို့မရနိုင်ဘူး ဖြစ်နေတယ်။ အားလုံးကို မျှတအောင် လုပ်သွားမယ်ဆိုရင်လည်း အားလုံးအတွက် ကျေနပ်လောက်အောင် ဖြစ်လာနိုင်မှာ မဟုတ်ဘူး။ ဒီအတွေးတွေကြောင့် အိပ်ပျက်ခဲ့ရတဲ့ ညတွေ ရှိသလို စိတ်ပင်ပန်းမှုတွေလည်း ဖြစ်လာမိတယ်။ စိတ်ပင်ပန်းမှုတွေနဲ့အတူ မြန်မာနိုင်ငံမှာ ကျန်ခဲ့တဲ့ အသက်ကြီးလှပြီဖြစ်တဲ့ အဖေနဲ့ အမေအတွက် စိတ်ပူနေမိတတ်တယ်။ ပြီးတော့ မပြည့်စုံသေးတဲ့ ကျွန်တော့်ဘ၀အတွက် စိုးရိမ်ဖိစီးမှုတွေ ၀င်လာမိတယ်။ ``ငါ ဘာလုပ်ရမလဲ´´ ဆိုတဲ့ မေးခွန်းကိုသာ ထပ်တလဲလဲ မေးနေမိတတ်တယ်။

ဗုဒ္ဓဟောကြားခဲ့တဲ့ ``လက်ရှိပစ္စုပ္ပန်ကို ကြည့်ပါ၊ အတိတ်ကိုလည်း ပြန်ပြောင်းမတွေးပါနဲ့၊ မဖြစ်လာသေးတဲ့ အနာဂတ်ကိုလည်း တင်ကြိုမစဉ်းစားပါနဲ့´´ ဆိုတဲ့ ဆိုဆုံးမတရား နဲ့လည်း ကျွန်တော် လွတ်နေပြီ။ ကျွန်တော်က အတိတ်ကို အဖြစ်အပျက်တွေကို စဉ်းစားပြီး အနာဂတ်ကို ကြိုတွေးနေမိတော့ ပစ္စုပ္ပန်အခြေအနေကို ထည့်မစဉ်းစားမိတော့ဘူး ဖြစ်နေတယ်။ ဒါကြောင့် ကျွန်တော် ဒုက္ခရောက်နေတာ။ မပျက်သေးတဲ့ ကမ္ဘာကြီးကို ကမ္ဘာပျက်ခဲ့ရင်သော်လို့ စဉ်းစားနေမိတဲ့ ကျွန်တော်......

(ဒီပို့စ်လေးဟာ ကျွန်တော့်ရဲ့ စိတ်ရှုပ်ထွေးမှုကို ဖွင့်ထုတ်ချလိုက်တာပါ။ နောက်ဆုံးအပိုဒ်ကို ရေးပြီးသွားတော့ ရင်ထဲမှာ နည်းနည်းပေါ့ပါးသွားသလိုပဲ။ ဒီပို့စ်လေးကို ဖတ်တဲ့ သူငယ်ချင်းအားလုံကို ကျေးဇူးတင်ပါတယ်။)

နွေးထွေးစွာဖြင့်
ဇေယျာဦး